Parissi chi dormi
lu cjumi chi scinni
e alliscia la chiatta
comu l'acqua ntà l'ogghiu
quannu lu sali si sparti all'acqua di mari
mentri di nfunnu arriva marrobbiu.
C'è friscura cà sta matina
e siddu aisa lu suli
dintra lu portu
di li pisci a li casci
unnì tocca lu n'cantu.
L'abbanniata di panza
a la vecchia marina
ammuccia misura
a lucenti balanza
chi duna lu pisu
a pisci ch'abballa
nmezzu a li vuci
di tanta crianza.
L'acqua sbrizziata a balata di Casbah
sbommica cjavuru
a lu cuscusu anticu
chi chjnu di cozzi
ntona ntà l'aria lu cantu africanu
mentri lu cori di tanti migranti
ncima la riti
e arracioppa li pezzi.
Ma n'abbrazza lu preiu
di lu pisci arrustutu
di la stiva ntipata
e di lu pani cunzatu.
Ma n'abbrazza la pena
di li figghj scumparsi
di lu chiantu scurdatu
darrera lu cozzu
di riti strazzati e lacrimi persi
e comu lu nziru anticchia pirciatu
perdu lu sucu dintra lu puzzu.
Ma addumannu spiranza
a la varca chi parti
mentri lassu cà nterra
la me rimanenza
chiuru l'occhi e attuppu lu cori
e aisu la manu a Santu Vituzzu.